आळंदीतील अनधिकृत वारकरी शिक्षण संस्था चौकशीच्या फेऱ्यात

महिला आयोगाकडे तक्रारी; अध्यक्षा रुपाली चाकणकर यांच्याकडून दखल 

आळंदी / प्रतिनिधी

आळंदी परिसरातील काही अनधिकृत वारकरी शिक्षण संस्थांच्या वसतीगृहामध्ये बालकांचे लैंगिक शोषण होत असल्याच्या तक्रारी राज्य महिला आयोगाकडे प्राप्त झाल्या आहेत. या अनुषंगाने आयोगाच्या अध्यक्षा रुपालीताई चाकणकर यांनी आळंदी पोलिस ठाण्यात आढावा बैठक घेत वारकरी शिक्षण देणाऱ्या संस्थांची तपासणी करण्याचे आदेश दिले आहेत. यासाठी २० पथके तयार करण्यात आली असून त्यांना दोन दिवसात चौकशी अहवाल सादर करण्याचे आदेश देण्यात आले आहेत.

दरम्यान आयोगाच्या या कडक पवित्र्यामुळे अनधिकृत वारकरी शिक्षण संस्थाचालकांचे धाबे दणाणले आहेत.

नोंदणी नसलेल्या, नियमावलीचे पालन न करणाऱ्या वारकरी शिक्षण संस्थांवर तात्काळ कारवाई करण्याचे आदेश चाकणकर यांनी दिले आहेत. त्यानुसार जिल्हाधिकारी, पुणे यांनी ३ सदस्यांचा सहभाग असलेल्या २० समिती स्थापन केल्या असून दिनांक ६ आणि ७ फेब्रुवारी या दोन दिवसात शिक्षण संस्था, वसतिगृहे यांची सखोल तपासणी करून स्वयंस्पष्ट अभिप्रायसह अहवाल सादर करण्याच्या सूचना या समितींना दिले आहेत.

या २० समिती ८ फेब्रुवारी रोजी जिल्हा महिला बाल विकास अधिकारी, पुणे यांना आपला अहवाल सादर करणार आहेत. यासाठी यादी तसेच विहित नमुना ही तयार करून देण्यात आला आहे. अध्यक्ष आणि दोन सदस्य अशी तीन सदस्यांच्या एकूण वीस समिती नेमण्यात आल्या असून यात गट शिक्षण अधिकारी, बाल विकास प्रकल्प अधिकारी, नायब तहसीलदार, प्रशासन अधिकारी, ग्राम महसूल अधिकारी, संरक्षण अधिकारी, समुपदेशक, विधी सल्लागार, शिक्षक, मुख्यसेविका यांचा समावेश आहे.

ADVT.

समिती स्थापन झाल्यानंतर श्रीमती चाकणकर म्हणाल्या, वारकऱ्यांचे श्रद्धास्थान असलेल्या आळंदीमध्ये सुरू असणाऱ्या वारकरी शिक्षण संस्थांमध्ये गैरप्रकार सुरू असून मुलांचे लैंगिक शोषण होत असल्याच्या तक्रारीची दखल घेऊन हे निर्देश देण्यात आले आहेत. ज्या प्रकरणात गुन्हा दाखल झालाय तिथे पोलिस तपास करत आहेत. आता समिती मार्फत सर्व अनधिकृत संस्थांचा सखोल तपास होणार आहे.  सर्व २० समितीचा अहवाल आणि त्यावरील एकत्रित अहवाल आल्यानंतर ठोस कारवाई करण्यात येईल.