 |
| मृत सचिन लोंढे |
पेठमध्ये तरुणाचा निर्घृण खून; चाकूने भोकसले
सांगली / प्रतिनिधी
वाळवा तालुक्यातील पेठ येथे दोन भावांतील भांडण सोडवण्यासाठी गेलेल्या सचिन सुभाष लोंढे (३७ रा. साठेनगर,पेठ) यांचा एकाने चाकूने भोसकून खून केला. दोन भावांचे भांडण सोडवण्याची मध्यस्थी सचिन याच्या जीवावर बेतली. ही घटना मंगळवारी रात्री साडेआठ वाजण्याच्या सुमारास घडली. याप्रकरणी एका संशयीतास पोलिसांनी अटक केली आहे.
संग्राम कमलाकर शिंदे (रा. साठेनगर, पेठ) असे संशयित आरोपीचे नाव आहे. पेठ येथील साठेनगर येथे शरद कमलाकर शिंदे व त्यांची बहिण ही घरी जात असताना संशयीत आरोपी संग्राम शिंदे याने भाऊ शरद शिंदे यांच्यासमवेत भांडण काढून जोरजोराने शिवीगाळ सुरु केली. यावेळी सचिन लोंढे हे संग्राम व शरद यांच्यामधील भांडण सोडवण्याकरीता गेले.
आरोपी संग्राम याला त्याचा राग आला. तु आमच्या भावांच्या भांडणामध्ये यायचे नाही. असे म्हणत हातातील चाकूने सचिन लोंढे यांच्या छातीमध्ये भोकसले.यामध्ये लोंढे हे गंभीर जखमी झाले.त्यातच त्यांचा मृत्यू झाला.याप्रकरणी मृत सचिन यांचा भाऊ राजेंद्र लोंढे यांनी इस्लामपूर पोलीस ठाण्यात फिर्याद दिली. पोलिसांनी तात्काळ आरोपी संग्राम याला अटक करण्यात आली आहे.