 |
| जप्त डंपरसह मंडल अधिकारी, तलाठी व कर्मचारी. |
◼️अवैध गौण खनिजचे उत्खनन रोखताना प्रकार
◼️अंजनीच्या प्रवीण पाटील सह दोघांवर गुन्हा
◼️ एक डंपर ताब्यात तर जेसीबी सह एक डंपर पळविला
तासगाव / प्रतिनिधी
वज्रचौंडे ( ता. तासगाव ) येथे अवैधरित्या माती उत्खनन रोखणाऱ्या मंडल अधिकारी व तलाठ्यांच्या पथकाला धमकवण्यात आले. गुरुवारी सकाळी हा प्रकार घडला. याप्रकरणी प्रवीण पाटील रा. अंजनी, ता. तासगाव) यांच्यासह दोन अनोळखी डंपर व जेसीबी चालकांविरोधात गुन्हा दाखल झाला आहे. मनेराजुरीच्या मंडल अधिकारी राजश्री सानप यांनी याबाबतची फिर्याद तासगाव पोलिसात दिली आहे.
याबाबत पोलिसातून मिळालेली अधिक माहिती अशी की, वज्रचौंडे - सावळज रस्त्यावर शंकर बापू शिंदे यांच्या गट नंबर १९८ मध्ये विनापरवाना मातीचे उत्खनन सुरू असल्याची माहिती महसूल सेवक अर्चना जाधव यांना मिळाली. ही माहिती त्यांनी मणेराजुरीच्या मंडल अधिकारी राजश्री सानप यांना सांगितली. त्यानंतर सानप यांच्यासह तलाठी अर्चना जाधव, उपळावीचे तलाठी आनंदा घेरडे, मणेराजुरीचे ग्रामसेवक प्रकाश पांढरे यांचे पथक घटनास्थळी पोहोचले. यावेळी शंकर शिंदे यांच्या गट नंबर १९८ मध्ये मोठ्या प्रमाणावर विनापरवाना जेसीबी व दोन डंपरच्या सहाय्याने मातीचे उत्खनन सुरू होते. यावेळी जेसीबी व डंपर चालकांना मातीच्या उत्खननाच्या परवान्याबाबत विचारले असता त्यांनी परवाना नसल्याचे सांगितले.
यावेळी वज्रचौंडेच्या पोलीस पाटील प्रणिता यादव यांना त्या ठिकाणी बोलावून घेण्यात आले. उत्खनन आणि दोन डंपर व जेसीबी याचा पंचनामा करून वाहने तहसील कार्यालयात घेण्यास सांगण्यात आले. मात्र जेसीबी व डंपर चालकांनी आम्हास मालकांनी सांगितल्याशिवाय वाहन हलवणार नाही. तुम्हाला काय करायचे आहे ते करा. तुम्ही इथून जा, असे म्हणून अर्वाची भाषेत तलाठी व मंडल अधिकार यांच्या पथकाला धमकावले.
महसूल पथकावर अरेरावी करीत जेसीबी व एक डंपर (एम. एच. १०. ए डब्ल्यू ७४२५) पळवून नेण्यात आला. तर (एम. एच. १०. सीआर ३२५४) हा डंपर पथकाने ताब्यात घेऊन तो तहसील कार्यालयात आणून लावला आहे. याप्रकरणी प्रवीण पाटील (रा. अंजनी, ता. तासगाव) यांच्यासह जेसीबी व डंपरच्या चालकांविरोधात तासगाव पोलीस ठाण्यात गुन्हा दाखल करण्यात आला आहे. अधिक तपास पोलीस करीत आहेत.