संस्कार लॉन विटा येथे आयोजन; पै. राहुल पवार यांची माहिती
सांगली / प्रतिनिधी
यंदाची महाराष्ट्र केसरी स्पर्धा अहिल्यानगर येथे २९ जानेवारी ते २ फेब्रुवारी या कालावधीत आयोजित करण्यात आली आहे. या पार्श्वभूमीवर सांगली जिल्हा निवड चाचणी स्पर्धा १८ व १९ जानेवारी रोजी साळशिंगे रोड, व्हिजन सिटी समोर, संस्कार लॉन, विटा (ता. खानापूर) या ठिकाणी आयोजित करण्यात आली आहे. सर्व पैलवानानी १८ जानेवारी रोजी सकाळी ८ वाजता उपस्थित राहावे असे आवाहन सांगली शहर जिल्हा तालीम संघाचे अध्यक्ष पैलवान राहुल पवार यांनी केले आहे.
महाराष्ट्र केसरी स्पर्धेच्या पार्श्वभूमीवर सांगलीत सांगली शहर जिल्हा तालीम संघाची नियोजन बैठक पार पडली. पैलवान पवार म्हणाले, यंदाची महाराष्ट्र केसरी स्पर्धा अहिल्यानगर येथे येथे २९ जानेवारी ते २ फेब्रुवारी या कालावधीत होणार आहे. यासाठी सांगली जिल्हा निवड चाचणी स्पर्धा १८ व १९ जानेवारी रोजी आयोजित केली आहे. सांगली शहर जिल्हा तालीम संघाच्या मान्यतेने लोकविकास प्रतिष्ठान पळशी, पै. सत्यजित (भैया) पाटील व मंतन (नाना) मिटकरी मित्र परिवार यांच्या संयुक्त विद्यमाने निवड चाचणी स्पर्धा होणार आहे.
सर्व खेळाडूंनी १८ जानेवारी रोजी सकाळी ८ वाजता स्पर्धेच्या ठिकाणी वजन करण्यासाठी उपस्थित रहावे. स्पर्धा दुपारी ३ वाजता सुरू होतील असे असे आवाहन पैलवान पवार यांनी केले आहे. यावेळी पै. सचिन पाटील, पै. सुनील चंदनशिवे, पै. सदाशिव मलगान, पै. नामदेव बडरे, पै. नितीन शिंदे, पै. सुनील परमने, पै. प्रताप एडके, पै. युवराज पाटील, पै. दत्तात्रय धोकटे, पै. सतीश जाधव, पै. उदय खंबाळे व पै. अविनाश सूर्यवंशी यांच्यासह पदाधिकारी उपस्थित होते.
