 |
| मुंबई येथे विविध खात्यांच्या मंत्र्यांशी चर्चा करताना सांगलीचे खासदार विशाल पाटील. |
मुंबईत विविध खात्यांच्या मंत्र्यांच्या भेटी; विकासात्मक प्रश्नावर चर्चा
सांगली / प्रतिनिधी
मकर संक्रांतीच्या पवित्र सणाचे औचित्य साधत खासदार विशाल पाटील यांनी मुंबईत महायुती सरकारमधील विविध खात्यांच्या मंत्र्यांच्या भेटी घेतल्या. तिळगुळ देत पक्षभेद बाजूला ठेवून सांगली जिल्ह्याच्या प्रगतीसाठी एकत्र काम करण्याची साद घातली. मंत्र्यांनीही विकास कामांमध्ये राजकारण आणले जाणार नाही. आवश्यक ते सहकार्य करू अशी ग्वाही दिल्याचे खासदार पाटील यांनी सांगितले. दरम्यान पाटील यांच्या या तिळगुळ डिप्लोमसीची मात्र मुंबईपासून सांगली पर्यंत चांगलीच चर्चा रंगली आहे.
खासदार पाटील म्हणाले, मंत्र्यांची भेट घेत त्यांच्याकडून सांगली जिल्ह्याच्या विकासासाठी सहकार्याची अपेक्षा व्यक्त केली. वैद्यकीय शिक्षण मंत्री हसन मुश्रीफ, पर्यटन व खनिकर्म मंत्री शंभुराजे देसाई, ओबीसी व बहुजन कल्याण मंत्री अतुल सावे, शालेय शिक्षण मंत्री दादाजी भुसे, सार्वजनिक आरोग्य मंत्री प्रकाश आबिटकर, सार्वजनिक बांधकाम मंत्री शिवेंद्रराजे भोसले, ग्रामविकास मंत्री जयकुमार गोरे आणि मदत पुनर्वसन मंत्री मकरंद आबा पाटील व संजय बनसोडे यांच्याशी संवाद साधला.
सांगली लोकसभा मतदारसंघातील प्रमुख विकास विषयांवर चर्चा केली. या चर्चेत सांगलीच्या प्रमुख समस्यांची सोडवणूक आणि भविष्यातील महत्वाकांक्षी प्रकल्पांसाठी राज्य सरकारची सहकार्याची आवश्यकता असल्याचे स्पष्ट केले. केंद्र सरकारच्या मदतीने सांगलीमध्ये विविध प्रकल्प राबवण्यासाठी राज्य सरकारच्या सहाय्याची गरज आहे, त्या दिशेने सर्व मंत्र्यांनी माझ्या दृष्टीकोनाला पाठिंबा दर्शवला असल्याचे सांगत खासदार पाटील म्हणाले, सर्वच मंत्र्यांनी माझ्या कार्यशैलीचे, संसदेतील भाषणांचे कौतुक केले याचा आनंद आहे. दरम्यान खासदार यांच्या या तिळगुळ डिप्लोमसीची मात्र मुंबईपासून सांगली पर्यंत मात्र चांगलीच चर्चा सुरू आहे.