सांगली / प्रतिनिधी
शहरातील जामवाडी परिसरातील घरातून दहा लाख रुपये किमतीचे २० तोळे सोन्याचे दागिने लंपास करणाऱ्या चोरट्यास सांगली शहर पोलिसांच्या गुन्हे प्रकटीकरण शाखेच्या पथकाने जेरबंद केले. त्याच्याकडून चोरीतील २० तोळे सोन्याचे दागिने पोलिसांनी हस्तगत केले आहेत. योगेश अनिल जाधव (३७, कोल्हापूर रस्ता, कबाडे हॉस्पीटल पाठीमागे, सांगली) असे संशयित चोरट्याचे नाव आहे.
याबाबत अधिक माहिती अशी की, जामवाडी येथील अनिरूद्ध चंद्रकांत सूर्यवंशी यांच्या घरातून चोरट्याने दहा लाख दहा हजार रुपये किंमतीचे २० तोळे सोन्याचे दागिने लंपास केले होते. याबाबत शहर पोलिसांत फिर्याद दाखल होती. दरम्यान घरफोडी व चोरीचे गुन्हे उघडकीस आणण्याचे आदेश दिले होते. त्यानुसार पोलिस निरीक्षक संजय मोरे यांनी गुन्हे प्रकटीकरण शाखेचे पथक नियुक्त केले. उपनिरीक्षक महादेव पोवार व पथक गस्तीवर होते. पथकातील संदीप पाटील, संतोष गळवे व गौतम कांबळे यांना कोल्हापूर रोडवरील आकाशवाणीजवळ योगेश जाधव हा चोरीतील दागिने विकण्यासाठी येणार असल्याची माहिती मिळाली.
 |
| (Add.) |
पथकाने घटनास्थळी धाव घेत जाधव याला ताब्यात घेतले. त्याच्याकडे सोन्याच्या सहा बांगड्या मिळून आल्या. सुरूवातीला त्याने उडवाउडवीची उत्तरे दिली. त्याची कसून केली असता सूर्यवंशी यांच्या घरातून दागिने चोरल्याची कबुली दिली. पोलिस अंमलदार संदीप पाटील यांनी जाधव याला ताब्यात घेतले. त्याच्याकडून सोन्याचा गोफ, सोन्याची चेन व बांगड्या असे दहा लाख दहा हजार रुपये किंमतीचे २० तोळे सोने जप्त करण्यात आले. कारवाईत विनयाक शिंदे, रफिक मुलाणी, सतीश लिंबाळे, योगेश सटाले, गणेश कोळेकर, संदीप कुंभार, योगेश हक्के, कॅप्टन गुंडवाडे यांचाही सहभाग होता.