माजी आमदार नितीन शिंदे
गुरुवारी कोल्हापूर जिल्हाधिकारी कार्यालयासमोर आंदोलन
सांगली / प्रतिनिधी
विशाळगड अतिक्रमण मुक्तीचे कवित्व संपायला तयार नाही. गड आधी अतिक्रमणमुक्त करावा, मगच पर्यटनासाठी खुला करावा अशी आग्रही मागणी शिवभक्तांसह हिंदू एकता आंदोलन संघटनेने केली आहे. या पार्श्वभूमीवर येत्या गुरुवार २३ जानेवारी रोजी सकाळी ११ वाजता कोल्हापूर जिल्हाधिकारी कार्यालयासमोर धरणे आंदोलन करणार असल्याची माहिती संघटनेचे प्रदेशाध्यक्ष माजी आमदार नितीन शिंदे यांनी दिली.
माजी आमदार शिंदे म्हणाले, विशाळगडावरील अतिक्रमण जैसे थे आहे. पावसाळा संपल्यानंतर अतिक्रमण काढणार होते. मात्र अद्याप कारवाई सुरू झालेली नाही. प्रशासनाने याबाबत गंभीरपणे निर्णय घेणे अपेक्षित आहे. मात्र प्रशासन याकडे दुर्लक्ष करत आहे. दरम्यान गडावरील दर्गाचे बांधकाम ही अनधिकृत आहे. ते पडून भरणाऱ्या उरुसावर कायमस्वरूपी बंदी घालावी.
नरवीर बाजीप्रभू देशपांडे व नरवीर फुलाजी प्रभू देशपांडे यांच्या समाधीस्थळी शासनाच्या वतीने स्मारक उभे करावे, या मागण्यासाठी हे आंदोलन करण्यात येणार आहे. या आंदोलनाला सर्व हिंदुत्ववादी संघटनांनी कार्यकर्त्यांनी मोठ्या संख्येने उपस्थित राहावे, असे आवाहन हिंदू एकता आंदोलन सांगली शहर जिल्हाध्यक्ष संजय जाधव, कोल्हापूर जिल्हाध्यक्ष दीपक देसाई, जिल्हा उपाध्यक्ष राजू जाधव, कोल्हापूर जिल्हाध्यक्ष चंद्रकांत बराले, शहराध्यक्ष गजानन तोडकर, प्रकाश चव्हाण, दत्तात्रय भोकरे, मनोज साळुंखे, अवधूत जाधव, अनिरुद्ध कुंभार, अरुण वाघमोडे, प्रतीक दिसले, गणेश नारायणकर यांनी केले आहे.