सांगलीत उभारली अयोध्यानगरी

उद्यापासून श्री राम कथा, नामसंकीर्तन सोहळा; २२रोजी मुख्यमंत्री फडणवीस येणार

सांगली / प्रतिनिधी

श्री राम मंदिराच्या प्रथम वर्धापनदिनानिमित्त येथील कलदृप क्रीडांगणावर भव्य अशी आयोध्यानगरीची प्रतिकृती उभा करण्यात आली आहे. यामधे उद्यापासून २७ जानेवारीपर्यंत श्री राम कथा व नामसंकीर्तन सोहळा आयोजित करण्यात आला आहे. याची तयारी अंतिम टप्प्यात असून २२ जानेवारी रोजी मुख्यमंत्री देवेंद्र फडणवीस या सोहळ्यास उपस्थित राहणार असल्याची माहिती सोहळ्याचे कार्याध्यक्ष मनोहर सारडा यांनी पत्रकार परिषदेत दिली.

या सोहळ्यात  केज (बीड) चे समाधान महाराज शर्मा हे रामकथा मराठीतून सांगणार आहेत. या सोहळ्यामध्ये दररोज सुमारे बारा ते पंधरा हजार भाविक सहभागी होतील. दररोज रामकथा, किर्तन, महाप्रसाद असे कार्यक्रम होणार आहेत.  यानिमित्त ध्वजारोहण, नामसंकिर्तन सोहळा, शोभायात्रा, श्रीराम विवाह, श्रीराम राज्याभिषेक श्रीरामजन्मोत्सव,अशा विविध कार्यक्रमाचे आयोजन करण्यात आले आहे.  या सोहळ्यादरम्यान १८  जानेवारी ते २६ जानेवारी दरम्यान समाधान महाराज शर्मा हे दररोज दुपारी २.३० ते संध्याकाळी ६ यावेळेत मराठीतून रामकथा सांगणार आहेत.

 दि. १७ जानेवारी रोजी सकाळी साडेआठ वाजता  शिवप्रतिष्ठानचे संभाजीराव भिडे (गुरूजी) यांच्या हस्ते ध्वजारोहण होणार आहे. यावेळी अकरा वैदिक ब्राह्मणांच्या मंत्रोच्चाराने शुभारंभ होणार आहे. यावेळी बजरंग झेंडे महाराज, गुरुनाथ कोटणीस महाराज, दीपकनाना केळकर महाराज, श्रीपाद चितळे, दिलीप वग्यानी, विनोद घोडावत, शिवलिंग शिवाचार्य स्वामीजी, नरेंद्रभाई जानी, नितीन झंवर, सतिश मालू, श्रीपाद चितळे आदी मान्यवर उपस्थित राहणार आहेत.

 याशिवाय कान्होबा महाराज देहूकर, योगीराज महाराज गोसावी, पैठण, गोविंद महाराज जाटदेवळेकर, पाथर्डी, उमेश महाराज दशरथे, आळंदी, महादेव महाराज राऊत, चैतन्य महाराज देगलूरकर, जयवंत महाराज बोधले, पंढरपूर, कृष्णा महाराज चवरे, पंढरपूर, ऋषिकेश महाराज वासकर, भागवत महाराज चवरे यांची किर्तन होणार आहेत.

 दि. १८ रोजी सकाळी साडेआठ वाजता राम मंदिर चौकातून भव्य-दिव्य अशी कलश, शोभायात्रा निघणार असून आयोध्यानगरीत पोहचणार आहे. या शोभायात्रेत हजारो रामभक्त,हत्ती,उंट,घोडे, यासह १५ ते २० प्रकारचे वाद्यपथकही सहभागी असणार आहेत. २० जानेवारी रोजी श्रीराम महोत्सव, २६ रोजी श्रीराम राज्याभिषेक सोहळा, १८ रोजी कलश शोभायात्रा तर २२ रोजी श्रीराम विवाह सोहळा असे विविध कार्यक्रमही होणार आहेत. यावेळी समितीचे अध्यक्ष प्रमोद मालू,विश्‍वास गवळी स्वागताध्यक्ष रमाकांत घोडके, मोहन जंगम, सचिव लक्ष्मण नवलाई, राहूल ढोपे-पाटील, ओमप्रकाश झंवर, आर.बी.पाटील आदी मान्यवर उपस्थित होते.