सांगलीत आदित्य हॉस्पिटलमध्ये तोडफोड

◼️ ‘वंचित’च्या १७ जणांवर गुन्हे ◼️ पाच लाखांचे नुकसान ◼️‘आयएमए’कडून निषेध

सांगली ः प्रतिनिधी

शासकीय आणि कामगार योजनेतील लाभार्थ्यांकडून अतिरिक्त रक्कम घेत असल्याचा आरोप करत विश्रामबाग येथील मल्टीस्पेशालिटी हॉस्पिटलमध्ये वंचित बहुजन आधाडीच्या आंदोलकांनी घुसून जोरदार राडा केला. संतप्त कार्यकर्त्यांनी हॉस्पिटलमधील निवासी डॉक्टरांसह कर्मचाऱ्यांना मारहाण करत तोडफोड केली. हॉस्पिटलचे सुमारे पाच ते सहा लाखांचे नुकसान झाले आहे. दुपारी साडेबाराच्या सुमारास आदित्य हॉस्पिटलमध्ये ही घटना घडली.

दरम्यान, याप्रकरणी डॉ. सुनील लक्ष्मण माने यांनी विश्रामबाग पोलिस ठाण्यात फिर्याद दिली आहे. त्यानुसार वंचित आघाडीच्या जिल्हाध्यक्ष शंकर माने यांच्यासह १७ आंदोलकांवर गुन्हे दाखल केले आहेत. पोलिस मुख्यालयाच्या हाकेच्या अंतरावर झालेल्या घटनेने खळबळ उडाली. आयएमए सांगली आणि मिरज शाखेने या घटनेचा तीव्र निषेध व्यक्त केला. संबंधितांवर कडक कारवाई झाली पाहिजे, अशी मागणी केली.

आयएमएचा निषेध

सांगली-मिरज आयएमएकडून या घटनेचा तीव्र निषेध व्यक्त करण्यात आला. त्यांनी दिलेल्या पत्रकार म्हटले आहे, की हॉस्पिटल हे रुग्णसेवेचे पवित्र ठिकाण आहे. येथे अहोरात्र सेवेमध्ये असणाऱ्या डॉक्टर, कर्मचारी किंवा रुग्णालयाच्या मालमत्तेवर कोणत्याही प्रकारचा हल्ला, तोडफोड करणे हे अमानवी आणि असंवेदनशील कृत्य आहे. अशा घटनांमुळे वैद्यकीय क्षेत्रात काम करणाऱ्या कर्मचाऱ्यांमध्ये भीती आणि असुरक्षिततेची भावना निर्माण होते. जर डॉक्टर आणि रुग्णालये सुरक्षित राहिली नाहीत, तर समाजाच्या आरोग्यरक्षणाची जबाबदारी घेणार कोण? यातील दोषींवर कडक कारवाई झाली पाहिजे.

‘वंचित’चे जिल्हाध्यक्ष शंकर माने, सिद्धनाथ माने, आकाश लोंढे, संतोष वनखडे, सविता माने, रेश्‍मा वनखेडे, राखी शिंदे (सर्व रा. कवठेमहांकाळ), सुरज काळे, संजय सनदी (दोघे रा.बोरगाव), बिरुदेव करडे (रा. वाल्मिक आवास, सांगली), पारगोंडा पाटील (रा. अथणी), विशाल कांबळे (रा.मिरज), शबाना पटेल (रा. शिरढोण), उज्ज्वला धोत्रे (रा. अंजनी), संजना आठवले (रा. इरळी), दीपाली सोनवणे (रा. मळणगाव), छाया कांबळे (रा. कोकळे) यांच्यावर गुन्हा नोंद झाला आहे.

पोलिसांनी दिलेली माहिती अशी, की विश्रामबाग चौकाच्या दक्षिणेला डॉ. शरद सावंत यांचे हे हॉस्पिटल आहे. येथे विविध शासकीय योजनेतून उपचार होतात. यातील काही उपचार योजनेत बसत नाहीत, असे सांगून अतिरिक्त शुल्क घेतल्याचा दावा एका रुग्णांच्या नातेवाईकांनी केला. तसेच कामगार योजेतून उपचारास नकार दिल्याच्या तक्रारी ‘वंचित’कडे आल्याची माहिती जिल्हाध्यक्ष माने यांनी दिली.

दरम्यान, आज याबाबत हॉस्पिटल परिसरात आंदोलनाचा इशारा देऊन माध्यम प्रतिनिधींना बोलवण्यात आले होते. प्रत्यक्षात मात्र दुपारी साडेबाराच्या सुमारास कार्यकर्ते हाती झेंडे घेत जोरदार घोषणाबाजी करीत हॉस्पिटलमध्ये घुसले. कार्यकर्त्यांनी निवासी डॉक्टर माने आणि कर्मचाऱ्यांनाही मारहाण केली. काही कार्यकर्त्यांनी काठ्यांनी हॉस्पिटलच्या औषध दुकानाच्या, खिडक्यांच्या टेबलांवरील काचांची तोडफोड केली.