◼️माजी आमदार नितीन शिंदे
◼️ संभाजीराव भिडे गुरुजींच्या भूमिकेला पाठींबा
सांगली / प्रतिनिधी
छत्रपती शिवाजी महाराज यांचा राज्याभिषेक साडेतीनशे वर्षापूर्वी तिथी, वेळ आणि दिव पाहून हिंदू धर्माच्या शास्त्रानुसार रायगडावर मोठ्या उत्साहात संपन्न झाला. तिथीनुसार ९ जून २०२५ रोजी शिवराज्याभिषेक दिन येतो. त्यामुळे ६ जून नव्हे तर ९ जून रोजी समस्त शिवराज्याभिषेक दिन मोठ्या थाटामाटात पारंपारिक पद्धतीने साजरा करावा असे आवाहन हिंदू एकता आंदोलनाचे प्रदेशाध्यक्ष तथा माजी आमदार नितीन शिंदे यांनी केले आहे.
दरम्यान यासंदर्भात दोनच दिवसांपूर्वी श्री शिवप्रतिष्ठान हिंदुस्थानचे संस्थापक श्री. संभाजीराव भिडे गुरुजी यांनी आवाहन केले होते. त्यांच्या भूमिकेला आपला पाठींबा असल्याचे सांगत माजी आमदार नितीन शिंदे म्हणाले, रायगडावर छत्रपती शिवाजी महाराजांचा शिवराज्याभिषेक तिथीनुसार झाला. त्याच दिवसापासून हिंदवी स्वराज्याची सुरुवात झाली. छत्रपती शिवाजी महाराजांच्या मुळे आज आपण हिंदू म्हणून जगत आहोत. तिथीनुसार सोमवार दिनांक ९ जून २०२५ रोजी शिवराज्याभिषेक दिन येतो. सर्व हिंदू धर्मीय दिवाळी, दसरा, गुढीपाडवा, नवरात्र उत्सव तसेच अनेक हिंदु सण, आपल्या घरातील लग्न, कार्य, भूमिपूजन, वास्तुपूजन हे तिथीनुसारच करतात. तसेच मृत्युनंतरचे हिंदू धर्मामध्ये विधी कार्य देखील तिथीनुसारच करतात.
म्हणून राज्यातल्या हिंदुत्ववाद्यांनी व शिवभक्तांनी ९ जून २०२५ रोजी चा शिवराज्याभिषेक दिन मोठ्या थाटामाटात पारंपारिक पद्धतीने साजरा करावा, अफजल खान वध दिन म्हणजेच शिवप्रताप दिन सातारा जिल्हा प्रशासन हे तिथीनुसारच प्रतापगडावर भगव्या ध्वजाला मानवंदना देऊन छत्रपती शिवाजी महाराजांच्या अश्वारूढ पुतळ्यावर हेलिकॉप्टरने पुष्पवृष्टी करून मोठ्या थाटामाटात साजरा केला जातो. श्री शिवप्रतिष्ठान हिंदुस्थानचे संस्थापक गुरुवर्य श्री संभाजीराव भिडे गुरुजी यांनीही तिथीप्रमाणे शिवराज्याभिषेक दिन साजरा करण्याचे आवाहन केले आहे. त्याला हिंदू एकका आंदोलन, महाराष्ट्र राज्याचा पाठिंबा राहील असे हिंदू एक आंदोलनाचे प्रदेशाध्यक्ष माजी आमदार नितीन शिंदे यांनी सांगितले. यावेळी हिंदू एकताचे संजय जाधव, अवधूत जाधव, राजू जाधव, अनिरुद्ध कुंभार, प्रदीप निकम, मनोज साळुंखे, प्रसाद रिसवडे, गजानन मोरे, प्रकाश चव्हाण, सोमनाथ गोठखिंडे, सुमित शिंगे आदी उपस्थित होते.
-