चांदोलीतील पर्यटन वाढीस चालना देणार

सह्याद्री व्याघ्र प्रकल्पाची पाहणी करताना आमदार सत्यजित देशमुख. सोबत अधिकारी.

 आमदार सत्यजित देशमुख; तब्बल सात तास अभयारण्याची पाहणी

शिराळा / प्रतिनिधी

सह्याद्री व्याघ्र प्रकल्प व चांदोली राष्ट्रीय उद्यान हे दोन्ही प्रकल्प पर्यटनाच्या दृष्टीने महत्वाचे प्रकल्प आहेत. यापुढच्या काळात या दोन्ही प्रकल्पांच्या विकासावर भर देणार असून पर्यटन वाढेल याकडे लक्ष दिले जाईल, असे मत शिराळा विधानसभा मतदार संघाचे आमदार सत्यजित देशमुख यांनी व्यक्त केले.

आमदार देशमुख यांनी तब्बल सात तास सह्याद्री व्याघ्र प्रकल्प व चांदोली राष्ट्रीय उद्यानाची पाहणी केली. यावेळी सह्याद्री व्याघ्र प्रकल्प उपसंचालक स्नेहलता ताई पाटील, सहाय्यक वनसंरक्षक संदेश पाटील आदींसह वनविभागाचे अधिकारी उपस्थित होते. ते म्हणाले चांदोली हे शिराळा तालुक्याला लाभलेले वरदान आहे. चांदोली धरण, सह्याद्री व्याघ्र प्रकल्प पाहायला अनेक पर्यटक येत असतात. या परिसराचा विकास व्हावा, अशी मागणी या ठिकाणी येणाऱ्या पर्यटकांची व नागरिकांची अनेक वर्षांपासून आहे. हा निसर्ग रम्य भाग पहाटे अनुभवावा यासाठी सकाळी ५.३० वाजलेपासून दुपारी १ पर्यत सलग सात तास हुन अधिक काळ या वनविभागाच्या अधिकाऱ्यांसमवेत प्रत्यक्ष अभयारण्यात जाऊन पहाणी केली. 

अभयारण्यात असणाऱ्या अनेक गोष्टी जाणून घेत वेगवेगळ्या वनस्पती, पक्षी यांची माहिती घेतली. या दौऱ्यामध्ये निसर्गाने आपल्याला किती वरदान दिले आहे याची प्रचिती आली. सह्याद्री व्याघ्र प्रकल्प राखीव व चांदोली अभयारण्य यांचा संपूर्ण अभ्यास केलेले रमन कुलकर्णी व फारूक म्हेतर यांनी अभ्यास पूर्ण माहिती दिली. पर्यटक वाढीसाठी अपेक्षित असणाऱ्या मुद्दावर चर्चा झाली. पर्यटक वाढला तर निश्चितपणे या विभागाचा आर्थिकस्तर वाढण्यास मदत होणार आहे. या पाहणी दौऱ्यामध्ये घेतलेले अनुभव निश्चित कायम स्मरणात राहतील. प्रकल्पाचा विकास साधण्यासाठी शासनाकडे पाठपुरावा करून पर्यटक वाढीस चालना देणार असल्याचे आमदार देशमुख यांनी सांगितले.