साताऱ्यात आयोजन ; प्रथम क्रमांकास ३ लाखांचे बक्षीस
सातारा / प्रतिनिधी
महाराष्ट्रातील सर्वांत मोठी स्व.श्रीमंत छत्रपती प्रतापसिंहमहाराज उर्फ दादा महाराज चषक दिवस-रात्र टेनिस बॉल स्पर्धा शुक्रवार दिनांक ७ फेब्रुवारीपासून सातारा येथील श्रीमंत छत्रपती शाहू स्टेडियम येथे सुरु होत आहे. तसेच स्पर्धेचा समारोप रविवार दिनांक २३ रोजी होणार आहे.
दिवस-रात्र क्रीकेट स्पर्धा केवळ महानगरामध्ये आयोजित होत असताना, सातारा जिल्हा क्रीकेट असोसिएशन, क्रीडाप्रेमी मान्यवर, क्रिकेटपट्टी यांच्या सक्रिय सहकार्यामुळे श्रीमंत छत्रपती उदयनराजे भोसले मित्र समुहाच्या वतीने सुमारे २१ वर्षापूर्वी सन २००३ मध्ये सातारच्या श्री. छ. शाहू स्टेडीयम येथे स्व. प्रतापसिंहमहाराज उर्फ दादामहाराज दिवस-रात्र टेनिस चेंडू क्रीकेट स्पर्धेची सुरुवात करण्यात आली.
या स्पर्धेत सहभाग नोंदवण्यासाठी राज्यातील संघांनी दि. ०६ फेब्रुवारी अखेरपर्यंत सातारा येथील श्री. झुंजार कदम-९९२२७६१०१०, विराज स्पोर्टस, ९४२०२७२१२ व विघ्नहर्ता स्पोर्टस, ९८८१५७५३८४ यांचेशी संपर्क साधुन आपला स्पर्धेती सहभाग नोंदवावा असे आवाहन स्पर्धेचे मुख्य आयोजक खासदार श्रीमंत छत्रपती उदयनराजे भोसले यांनी केले आहे.
यंदाचे वर्षी या स्पर्धेचे २२ वे वर्ष आहे. यंदाच्या स्पर्धेत पहिल्या तीन क्रमांकाना रोख बक्षिसे व चषक प्रदान करण्यात येणार आहे. प्रथम, व्दितीय व तृतीय क्रमांकास अनुक्रमे रुपये ३ लाख, २ लाख व १ लाख रुपयांचे रोख पारितोषिक ठेवण्यात आले आहे. तृतीय क्रमांकाचे बक्षिस जिंकणा-या आणि हरणा-या संघात विभागून देण्यात येणार आहे.
या स्पर्धेचे संपूर्ण आयोजन उदयनराजे भोसले मित्रसमुहातर्फे करण्यात आले असून, सातारा क्रीकेट असोसिएशन तर्फे आंतर्राष्टीय नियमानुसार स्पर्धाचे आयोजन होणार आहे. क्रीकेट स्पर्धेसाठी उच्य क्षमतेचे हायमास्ट प्रकाशझोताचे आवश्यक दिवे लावण्यात येणार आहेत. तसेच खेळपटटी टेनिस क्रिकेटच्या नियमानुसार बनविणेत येत आहे. स्पर्धेच्या क्रीडांगणावरील (पीच वरील) प्रत्येक निर्णयाचे पुर्नविलोकन होण्यासाठी थर्ड अंपायची विशेष व्यवस्था असणार आहे.
या स्पर्धेच्या अंतिम दिवशी म्हणजेच दिनांक २३ फेब्रुवारी रोजी सेमी फायनल आणि फायनलच्या मॅचेस होणार असून, फायनल मॅच नंतर लगेचच बक्षिस समारंभ मान्यवरांच्या हस्ते होणार आहे. या स्पर्धेला क्रीडा समिक्षक आणि मार्गदर्शक सुरेश साधले, माजी नगराध्यक्ष निशांत पाटील, स्पर्धेच्या आयोजनाची जबाबदारी घेतलेले अमोल पाटुकले यांचेसह उदयनराजे भोसले मित्र समुहाचे सर्व कार्यकर्ते विशेष परिश्रम घेत आहेत.