बनावट नोटा; दोघांना अटक

(प्रतिकात्मक फोटो)

नोटांसह प्रिंटर्स जप्त; नोटांसाठी हॉंगकॉंग मधून आणला कागद 

कोल्हापूर / प्रतिनिधी 

बनावट नोटा छापून त्या चालनात आणणाऱ्या दोघांना करवीर पोलिसांनी गुरुवारी रात्री अटक केली. सिद्धेश श्रीकांत घाटगे (रा- दत्तोबा शिंदेनगर कळंबा, ता- करवीर) आणि विकास वसंत पानारी (रा- शिवसृष्टी पार्क, शाकंभरी कॉलनी, शिंगणापूर) अशी अटक केलेल्या आरोपींची नावे आहेत. त्यांच्याकडून ५०, २०० व ५०० रुपयांच्या नोटा जप्त करण्यात आल्या आहेत. नोटा छापण्यासाठी त्यांनी हॉंगकॉंग येथून हाय सिक्युरिटी थ्रेडचा कागद आणल्याचे पोलिसांच्या तपासामध्ये समोर आले आहे.

दरम्यान त्यांच्याकडून बनावट नोटा, प्रिंटर्स पोलिसांनी जप्त केले आहेत. याप्रकरणी संशयित आरोपींना २५ फेब्रुवारीपर्यंत पोलिस कोठडीत ठेवण्याचे आदेश न्यायालयाने दिले आहेत. पोलिसांनी दिलेल्या माहितीनुसार, केंद्र सरकारच्या तपास यंत्रणेला सिद्धेश घाटगे हा घरी बनावट नोटा छापत असल्याची माहिती मिळाली. त्यांनी गोपनीयपणे सापळा रचून छापा टाकला. त्यावेळी घाटगे हा सरकारचा महसूल बुडवण्यासाठी बाहेरील देशातून साधनसामग्री मागवून बनावट नोटा छापत होते. 

त्यांना अटक करून त्यांच्याकडील ए फोर साइझचे ४ पेपर, ५० रुपयांच्या ६ बनावट नोटा, २०० रुपयांच्या ४ बनावट नोटा, ५०० रुपयांच्या ४ बनावट नोटा, कोऱ्या कागदावर हाय सिक्युरिटी थ्रेड असलेली रंगीत पट्टी त्यावर आरबीआय आणि भारत असे छापलेले कागद जप्त करण्यात आले आहेत. सिद्धेश घाटगे याच्याकडे चौकशी केल्यानंतर बनावट नोटा चलनात आणणारा विकास पानारी यालाही पोलिसांनी अटक केली. केंद्रीय तपास यंत्रणेच्या अधिकाऱ्यांच्या फिर्यादीवरून करवीर पोलीस ठाण्यात  या घटनेची नोंद करण्यात आली आहे.