रविवारी विशेष मोहीम; जिल्हाध्यक्ष प्रकाश ढंग यांची माहिती
सांगली / प्रतिनिधी
भारतीय जनता पार्टीने संपूर्ण देशभरात सभासद नोंदणी मोहीम हाती घेण्यात आली आहे. या पार्श्वभूमीवर सांगली जिल्ह्यातही येत्या रविवार ५ जानेवारी रोजी सांगली आणि मिरज विधानसभा मतदार संघातील एकाच वेळी ६२२ बुथवर सभासद नोंदणी करण्यात येणार आहे. प्रत्येक बुथवर किमान २०० सभासद नोंदणी करण्याचे उद्दिष्ट देण्यात आले आहे, अशी माहिती भाजपचे शहर जिल्हाध्यक्ष प्रकाश ढंग यांनी दिली.
ढंग म्हणाले, पक्षाने येत्या रविवार ५ जानेवारी ते १२ जानेवारी पर्यंत सभासद नोंदणी हाती घेतली आहे. सांगली व मिरज विधानसभा मतदार संघात रविवारी विशेष सभासद नोंदणी मोहीम घेतली आहे. दोन्ही मतदार संघात एकूण ६२२ बूथ आहेत. यामध्ये सांगली ३१५ व मिरजेतील ३०७ बूथ आहेत. या बुथवर एकाच वेळी सभासद नोंदणी सुरू होईल. सर्व बूथ प्रमुख, शक्ती केंद्रप्रमुख, पन्ना प्रमुख यांच्या बरोबरीने सर्व जिल्हा कार्यकारिणी सदस्य आजी-माजी नगरसेवक आजी माजी जिल्हा परिषद सदस्य, पंचायत समिती सदस्य, सरपंच, ग्रामपंचायत सदस्य, सर्व पदाधिकारी या सभासद नोंदणी कार्यात सहभागी होणार आहेत.
सांगलीमध्ये आमदार सुधीर दादा गाडगीळ आणि मिरजेमध्ये आमदार सुरेश भाऊ खाडे हे स्वतः एकेका बुथवर सभासद नोंदणीसाठी उपस्थित राहणार आहेत. प्रत्येक बुथवर किमान २०० सदस्य व्हावेत असे उद्दिष्ट ठरवण्यात आले आहे. संपूर्ण महाराष्ट्रात त्या दिवशी मुख्यमंत्री देवेंद्रजी फडणवीस प्रदेशाध्यक्ष चंद्रशेखर बावनकुळे यांच्यासह भारतीय जनता पक्षाचे सर्व आमदार खासदार मंत्री आपापल्या मतदारसंघात आपापल्या बूथ वर सभासद नोंदणीचे काम करणार आहेत. सांगली विधानसभा आणि मिरज विधानसभा मतदारसंघातील सभासद नोंदणीसाठी कार्यकर्त्यांनी मोठ्या प्रमाणावर सहभागी व्हावे असे आवाहन ढंग यांनी केले आहे.